सूर्यविनायक नगरपालिकाले आयोजना गरेको स्थानीय पाठ्यक्रममा आधारित शिव सर्किट अध्ययन–अवलोकन भ्रमण उत्साहजनक रुपमा सम्पन्न
भक्तपुर, २४ साउन । सूर्यविनायक नगरपालिकाले आज आयोजना गरेको नगरपालिका भित्रका सामुदायिक तथा संस्थागत विद्यालयमा स्थानीय पाठ्यक्रम ‘हाम्रो सूर्यविनायक’ विषय अध्यापन गराउने एक–एक जना शिक्षकलाई शिव सर्किट अध्ययन–अवलोकन भ्रमण आज सम्पन्न भएको छ ।
नगरपालिकाको सामाजिक विकास समितिले आज ६ वटा बसमा सूर्यविनायक नगरपालिकाको कार्यालयमा भेला भएर सुरु भएको शिव सर्किटको अध्ययन भ्रमणमा सूर्यविनायक नगरपालिका वडा नं. २ को वडाकार्यालयसंगै रहेको धर्मेश्वर महादेव मन्दिरबाट धार्मिक एवं अध्ययन–अवलोकन भ्रमण सुरु भएको थियो ।
सूर्यविनायकमा रहेको करिब ९८ वटा सामुदायीक तथा संस्थागत विद्यालयका ‘हाम्रो सूर्यविनायक’ विषय अध्यापन गराउने शिक्षक शिक्षिका, नगरपालिकाका जनप्रतिनिधि एवं कर्मचारी र पत्रकार गरिक करिब १५० जनाको भ्रमणमा सहभागिता रहेको थियो ।
वडा नं. २ को धर्मेश्वर मन्दिरमा वडा अध्यक्ष प्रदीप कार्कीले नगरपालिकाको उपप्रमुख सरिता तिमसिना (भट्टराई), प्रमुख प्रशासकीय अधिकृत युवराज आचार्य, नगरपालिकाका प्रवक्ता एवं सामाजिक विकास समितिका संयोजक रविन्द्र सापकोटा, वडा नं. ५ का वडाध्यक्ष राजकुमार जोशी, शिक्षा शाखा प्रमुख रत्न बहादर कटुवाल, सूचना अधिकारी राजेन्द्र प्रसाद नेपाल, वरिष्ट इन्जिनियर जनक न्यौपानेलगायत नगरपालिकाका शिक्षा शाखाका कर्मचारी, बिभिन्न विद्यालयबाट सहभागि शिक्षक शिक्षिकाहरुलाई टीका र रामनामी खादा लगाएर स्वासग गर्दै भ्रमणको शुभारम्भ भएको थियो ।
त्यस पछिको यात्रा वडा नं. १ र २ को संगमस्थलको गुप्तेश्वर महादेव मन्दिरमा वडाध्यक्ष कार्कीले पुन ः स्वागत गरेसंगै वडा नं. १ सिरुटारस्थित सोमलिङ्गेश्वर महादेव मन्दिर र चरखण्डीश्वर महादेव मन्दिरमा वडा अध्यक्ष रानुकाजी कायस्थले भ्रमण टोलीलाई स्वागत गर्नु भएको थियो ।
अध्ययन–अवलोकन भ्रमण टोली शिव सर्किटको रुट अनुसार नै दधिकोटको अनन्तलिङ्गेश्वर महदेव, गुण्डुको पाथीभरा मन्दिर, मत्स्यश्वर महादेव, रामभक्तेश्वर महादेव, कटुञ्जेको सुवर्णेश्वर महादेव, सूर्यविनायक गणेश मन्दिर, घ्याम्पे डाँडाको पाईलट बाबा आश्रम, सिपाडोलको आशापुरी महादेव, चित्तपोलको कैलाशनाथ महादेव, लटरम्बेश्वर महादेव, महाकांलेश्वर महादेव, नंखेलको नन्दिकेश्वर महादेव हुदै साँझ सिपाडोलको प्रसिद्ध डोलेश्वर महादेव मन्दिर प्राङ्गनमा पुगेर दर्शन एवं सन्ध्या आरतीमा सहभागि गराई यात्रा सम्पन्न भएको थियो ।
सूर्यविनायक वडा नं. १ देखि १० सम्मका शिव मन्दिरहरू समेटेर निर्माण गरिएको शिव सर्किटको अध्ययन अवलोकन भ्रमणमा प्रत्येक शिवालय एवं मन्दिरमा स्थानीय जनप्रतिनिधि एवं वडाध्यक्षले टोलीलाई स्वागत गर्नु भएको थियो ।
स्थानीय पाठ्यक्रम अध्यापन गराउने शिक्षक एवं शिक्षिकाहरुले स्थानीय धार्मिक, सांस्कृतिक तथा ऐतिहासिक सम्पदाबारे प्रतक्ष्य अवलोकनबाट ज्ञान लिई ‘हाम्रो सूर्यविनायक’ विषयलाई अझ प्रभावकारी र व्यवहारिक रूपमा अध्यापन गर्न सहयोग पु¥याउने विश्वास लिएको उपप्रमुख उपप्रमुख सरिता तिमसिना (भट्टराई) ले जानकारी दिनुभयो ।
सूर्यविनायक नगरपालिकाले नगरभित्रका सामुदायिक तथा संस्थागत विद्यालयमा ‘हाम्रो सूर्यविनायक’ विषय अध्यापन गराउने एक–एक जना शिक्षकलाई शिव सर्किट अध्ययन–अवलोकन भ्रमणमा सहभागी गराएको संयोजक रविन्द्र सापकोटाले जानकारी दिनुभयो ।
स्थानीय धार्मिक, सांस्कृतिक तथा ऐतिहासिक सम्पदाबारे शिक्षकको ज्ञान अभिवृद्धि गरी ‘हाम्रो सूर्यविनायक’ विषयलाई अझ प्रभावकारी र व्यवहारिक रूपमा अध्यापन गर्न सहयोग पु¥याउने उदेश्यले गरिएको अध्ययन भ्रमणले स्थानीय पठन पाठनमा सहयोग पुग्ने उहाँले बताउनुभयो ।
स्थानीय इतिहास, संस्कृति र सम्पदासँग जोडिएको शिक्षालाई थप जीवन्त बनाउन नगरपालिकाले निर्माण गरेको शिव सर्किटमा रहेको शिवालयहरुको अध्ययन भ्रमणले शिक्षिक शिक्षिकालाई स्थानीय पाठ्यक्रममा अध्ययन गराउन सहज हुने बताउदै यो भ्रमणले प्रचार प्रसारमा समेत टेवा पुग्ने बताउनुभयो ।
अध्ययन–अध्यापन भ्रमणमा सहभागि शिक्षक रत्न राईले नगरपालिकाले सञ्चालन गरेको स्थानीय पाठ्यक्रमको अध्ययन अध्यापनमा यो भ्रमणले ठूलो टेवा पुग्ने बताउनुभयो ।
अर्का शिक्षक शिक्षिकाहरुले यस अध्ययन भ्रमणले स्थानीय पाठ्यक्रम अध्ययन अध्यापनमा सहज हुने बताउदै सुनेको र देखेकोमा फरक पर्ने भएकाले सुनेको भरमा नभई शिक्षक शिक्षिकाले देखेकै आधारमा पनि अध्ययन गराउन सक्ने बताउनुभयो ।
डोलेश्वर महादेव मन्दिरमा भएको समापन कार्यक्रममा नगरपालिकाका प्रमुख वासुदेव थापाले स्थानीय पाठ्यक्रममा शिव सर्किटको उल्लेख गरिएको र शिव सर्किटमा रहेको १४ वटा शिवालयलगायतका यहाँका मन्दिरको बारेमा अध्ययन अध्यापन गराउन भ्रमणले ठूलो टेवा दिने विश्वास लिएको बताउनुभयो । शिव सर्किटलाई नगरपालिकाले पर्यटकीय गन्तव्यको रुपमा समेत विकास गर्ने उहाँले बताउनुभयो ।
